Belarus President thar atan Lukashenko lalut

Belarus President Alexander Lukashenko chu a hmaa puangzar lawk loin nimin khan President term thar chelh turin rinawmna thu tiam tirin lakluh a ni. 

President lakluh tur hi hun pawi­mawh tak a nih avangin a hmain puan­zar lawk a ni ṭhin. Mahse kumin August 9-a inthlana Lukashenko chak dan chu eptuten na takin an sawisel a, President hi bang tura phuta hun rei tak nawrh an huaihawt avangin kumina President lakluh inkhawm neih tur hi sorkarin a puang lawk duh lo a ni. 

State news agency Beltra chuan a term rukna atana President lakluh inkhawm  hi an ram khawpui Minsk-a Palace of Independence-ah neih a nih thu leh, sawm bik sorkar official-te chauh an tel thu a tarlang. 

Hetih lai hian eptute chuan August thlaa inthlanah vote tihchingpen anih avangin Lukashenko hi bang tur leh, inthlan ṭhat an phut thu an sawi. Kar ruk chhung chu nawrh an huaihawt tawh a ni. Central Election Commission-in inthlan result a tihchhuahah, Lukashenko hian vote tla aṭangin 80.1% a hmu pha a ni.