Kuminah Nobel prize award ceremony nei dawn lo

Kumin tina neih ṭhin Nobel prize award semna inkhawm, December 10-a neih ṭhin chu Covid-19 hri leng vangin kuminah chuan neih a ni dawn lo. 

Kum 1901 aṭanga sem chhuah, khawvel chawi­mawina sang, Nobel prize award semna inkhawm hi Sweden khawpui Stockholm-a concert hall-ah neih ṭhin a ni. Nobel Foundation execu­tive director Lars Heikensten chuan Thawhlehnia Swedish Television (SVT)-in an kawmnaah Covid-19 hri leng vangin kuminah chuan kalkhawm a theih dawn loh thu a sawi a, awmkhawmna hmunah hri inkaidarh a awlsam avangin award semna inkhawm neih tur hi an ṭhulh thu a sawi bawk. 

Heikensten chuan dan pangngai anga kalkhawma award semna inkhawm hi buatsaih theih ni dawn lo mah se, kum dang ang bawkin award hi sem a nih dawn thu a sawi. Ruahman lawk dan chuan Stockholm-a City Hall aṭangin online kaltlangin Nobel Prize hi sem a ni dawn a, a dawngtute chu an inlam aṭanga chhim tura tih an nih thu leh medal chu an awmna hmunah an dawng thei dawn tih Heikensten chuan a sawi bawk a ni. 

Nobel prize dawng tur hi October thlaah an puang ṭhin a, award hlanna inkhawm hi December 10, Nobel Day-ah Stockholm-a Concert Hall-ah neih a ni ṭhin. Award hlanna inkhawm neih zawh hnuah, Stockholm City Hall-ah Nobel Banquet neih zui a ni ṭhin bawk.  Mahse kumin hian Covid-19 vangin Nobel Banquet hman theih a nih dawn loh thu July thla khan Nobel Foundation chuan a lo tarlang tawh bawk.