Pakistan PM-in Airlines ads post chhui chiang turin ti

Pakistan prime minister Shehbaz Sharif chuan Pakistan International Airlines (PIA) in social media-a advertisement an post chu chhui chiang turin thupek a ti chhuak.

PIA-in kum li chhung Paris-a an service an tih tawp hnua thlawhtheihna thlawh chhunzawm tir a ni leh lawmna puala an ad post hi kum 2001-a New York-a World Trade Centre beih a nih lai nen a in ang hle a, hei vang hian sawiselna pawh a tam hle. He advertisment hi PIA official X-ah January 10 khan a dah a, an thlawhtheihna in Eiffel Tower lam a pan lai thla niin, a hnung lamah France flag dah a ni a, a caption-ah 'we're coming today' tih an ziak.

He advertisement design hi firfiakten US-a twin tower an beihna, 9/11 thlalak nena in anna a nei a, thlalak an post hi ni reiloteah view mtd 21 chuang an nei hman.

Parliamentary session-ah Pakistan finance minister Ishaq Dar chuan Prime Minister Sharif-a'n he ad siamtute chhui chiang tura thupek a tih chhuah thu hi a sawi a, an design hi a mawl thlak hle a ni, a ti.

PIA hian kum li hnuah a vawi khatna turin January 10 khan Charles de Gaulle Airport-ah Paris fligth hmasa ber tur an ṭum tir leh a ni. EU chuan PIA flight a hrekna hi a ti tawp a, mahse US leh UK-ah erawh an la service khapsak an la ni thung.