Biden Vs Trump Sept 26-ah debate dawn
US President thlanna neih tura inkhung tur, Republican party candidate Donald Trump leh Democrats party candidate Joe Biden-te chuan September 29 hian hmaichhanah debate hmasa ber an nei dawn.
Commission on Presidential Debates chuan September 29-a debate hmasa ber tur buatsaihah hian candidate pahnihte hian topic pali - Supreme Court justice chungchang, coronavirus leng chungchang, voting integrity leh khawpui hrang hranga chi inthliarna leh tharum thawhna thleng ṭhin chungchang zawhnate an chhang ang. Hei bakah hian an ram economy leh an track record neihte pawh an sawi dawn bawk a ni.
November 3-a inthlan neih tur atan hian candidate pahnihte hi campaign nei reng mah se, an rama hripui leng avangin kum dang angin campaign hi kalpui theih a ni lo. Debate hmasa ber neih turah hian moderator tur chu Fox News anchor Chris Wallace a ni dawn a, an debate-na tur topic pawh hi a thlan a ni a, he hun hi Cleveland, Ohio-ah buatsaih a ni ang. Candidate pahnihte hi October 15 hian Nashville leh, Ocotber 22-ah Miami-ah debate an nei leh dawn a ni.
October-15-a debate an neih turah hian C-SPAN political editor Steve Scully chu modetor a ni dawn a, debate vawi thumna October 22-ah neih turah 'Today' program co-anchor leh NBC News-a White House correspondent Kristen Welker chu moderator a ni dawn a ni. Vice-presidential debate hi US Today-a print journalist, Susan Page-in a moderate ve thung ang. Democratic vice presidential nominee Sen. Kamala Harris leh vice president Mike Pence-te pawhin October 7 hian Salt Lake City, Utah-ah debate an nei dawn bawk.
Debate neih turte hi minute 90 chhung vek niin, an ram huna zan dar 9-ah neih ṭan ṭhin a ni dawn a, an rama cable channel leh network lian hrang hrangten an tihchhuah dawn bakah YouTube-ah pawh live-in tihchhuah a ni dawn a, debate neih chhung hian fakna tihchhuah a ni lo ang. Kum 2016 inthlan dawna candidate pahnih, Donald Trump leh Hillary Clinton-ten debate ṭum thum an neihah khan TV lam aṭanga thlirtu, mi maktaduai 74 vel zel awm ziah anga chhut a ni. Presidential candidate-te zingah live audience nei ngah ber an la ni.