Britain PM-in inkhuahkhirhna thar tichhuak

Britain prime minister Boris Johnson chuan Thawhlehni khan an ramah Covid-19 hri leng thawh hnihna a thlen a hlauhthawnawm thu sawiin, hei vang hian thla ruk chhung atana hman tur inkhuahkhirhna a tichhuak thar leh. 

PM Johnson chuan an rama mipuite hnenah an theih chin chinah in lama hna thawk turin a hriattir a, restaurant leh bar-te chu a rang lama khar turin a hriattir bawk. Britain rama mithiamte chuan hri darh zel tur venna atana  hma lak thuai a nih loh chuan Covid-19 vangin thihna a thlen tam theih thu an tarlan hnuah, Johnson chuan khuahkhirhna thar hi a siam a ni. March thlaa inkharkhip pumhlum  a puan ang chu a ni lo a,  mahse hri darh zel chu an thunun theih loh chuan khuahkhirhna khauh zawk hman a la ni leh ang tih a sawi lawk. 

Mipuite chu hna thawka chhuah phalsak an nih hnu rei vak loah he ruahmanna thar hi siam a ni leh a, PM chuan Ningani aṭang chuan pub, bar, restaurant leh hospitality service-te chu zan dar 10-ah inkhar tura tiin, table service chauh phal a ni ang. Johnson chuan TV-a thu a sawiah, hri leng thawhhnihna a thlen lohna tura hma an lak thuai hi a ngai tih a sawi a, hei hi mipuiten hna an thawh a, dawr leh school te hawn a nih leh theihna tur zawk a ni, a ti. Mipuite chu hri darh tur venna kawnga lungrual taka thawk ho chungin, an ram hmasawnna turin an thawk thei a ni, a ti. Dan kenkawhna kawngah police-te pui turin a ṭul chuan sipaite pawh koh theih an ni, tiin a sawi. 

Scientist-te chuan hri darh zel tur venna kawnga chak zawka hma lak a nih loh chuan, October thla laihawlah chuan nitin hri kai hmuh thar 50,000 vel an tling ziah thei dawn niin an sawi a ni. Britain-ah hian khawlaia hmaituamna vuah lo chu pound 200 chawitir theih an ni a, dan bawhchhiate chu vawi khatnaah pound 1,000 chawitir niin, hemi hnuah dan an bawhchhe chhunzawm leh a nih chuan pound 10,000 chawitir an ni ang.