Inbiakna chhunzawm turin Israel leh Palestinian ngen

France chuan Israel leh Pales­tinian chu remna kawnga zawnga inbiakna chhunzawm leh turin a ngen.

France Foreign Minister Lau­rent Fabius chuan ram pahnihte hian inbiakna dawhkan an kil leh thuai a ngaih thu sawiin, an inbiakna tihbahlah a nih hian an inkar buaina a chhem alh zawk a ni, a ti. Nimin khan Fabius hian Palestinian President Mahmoud Abbas leh Israel Prime Minister Benjamin Netanyahu a hmu.

US kaihhruaia Israel leh Pales­tinian-in inbiakna an neih chu kum 2014 April khan a tawp a, mahse ram pahnihte inkar boruak hi a chhiat belh zel avangin France chuan inbiakna chhunzawm leh thuai tur hian a ngen a ni.

Ni hnih chama Middle East tlawhtu, France Foreign Minister hian Inrinni khan Egypt President Abdel Fattah el-Sisi a kawm a, an inkawm hnua chanchin thar lakhawmtute a kawmnaah Fabius chuan, "Israel leh Palestinian hian inbe tura bul an ṭan thar leh a ngai a, hemi atan hian theihtawp kan chhuah a ngai a ni," tiin, engmah ti loa an lo thlir mai chuan thil ṭha lo buaina lian zawk a thlen zel a hlauhawm thu a sawi.

Fabius-a'n Security Council kaltlanga inbiakna neih a rawt erawh Israel chuan a duh loh thu a sawi a, hei hi PM Netanyahu-a pawhin sawipui a tum a ni. Israel chuan UNSC kaltlanga inremna an siam a nih chuan, Palestinian-te'n inbiakna ṭha tak nei si loa an buaina chinfel theih maia an ngaih an hlauh thu a sawi.

Palestinian nena an inkar boruak siamṭhatna kawng khat atan Israel sorkar chuan West Bank-a cheng, Palestinian-te chu Muslim hun pawimawh, Ramadan-ah Jerusalem-a ṭawngṭai tura an kal a phalsak. Hei hi kum dangah a phal ngai lo. Jerusalem-a Mus­lim hmun thianghlim, Al-Aqsa Mosque-a ṭawngṭai turin kum 40 chin chunglamte an kal phalsak an ni a, hei vang hian kuminah mi tam takin mosque hi an pan khawm rin a ni a, kar kalta Inrinni thleng kham mi 80,000 chuang an thleng tawh.