Bin Laden-a fapa-in a pa 'death certificate' a phut
US Navy Seal-te'n an kahhlum, al-Qaida firfiak pawl hotu, Osama bin Laden an kahhlum chungchanga US sorkarin documents a tihchhuahah a death certificate a tel lo nia sawi a ni. He thu hi Wikileaks in document pawimawh a tlangzarh tharah a tel.
Osama bin Laden-a fapa chuan US sorkar hnenah hian a pa death certificate a dil tiin Wikileaks website chuan a tarlang. Wikileaks in document pawimawh a tlangzarh zingah hian Saudi Arabia sorkar document 60,000 zet a tel.
Consul Genral Glen Keiser chuan kum 2011 khan bin Laden-a fapa, Abdullah Bin Laden-a hnenah hian a pa death certificate an pek theih loh thu a hrilh nia tarlan a ni bawk. Death certificate aiah hian bin Laden kahhlum a nih ngei tih finfiahna, US court record-te a pe zawk a ni. Abdullah-in a pa death certificate a dilna chhan hi tarlan tel a ni lo.
Wikileaks chuan thla tharah hian document nuai nga chuang zet a tlangzarh leh dawn tih a sawi. Saudi Arabia document a tlangzarhte hi eng anga a neih nge tih hriat a ni lo a, mahse kumin May thla khan Saudi foreign minsitry website chu Yemen Cyber Army-te'n an hack sak tih a sawi tel a ni.
Document tlangzarhte hi a dik ngei an ni em tih erawh hriatchian a la ni lo a, a dik a nih chuan Saudi Arabia ramchhung inrelbawlna tam tak puanzar a ni dawn a ni. Iran nena an inkar boruak ṭhat loh dan te, Syria helpawl a puih dan leh Egypt-a sipai sorkar a thlawp dante tarlan a ni a, Iran nuclear program chungchanga inremna siam tuma hmalak mek a dodal thute pawh tarlan a ni bawk.