SKorea President hrem mek hren hun pawtsei

South Korea President hren mek Yoon Suk Yeol chu Seoul court chuan a hren theih hun a pawtsei.

Yoon Suk Yeol hi an rama sipai thuneihna sang pekna tur, martial law a puan avangin President a nihna aṭanga paihthlak rawtna pawh an ram Parliament chuan a lo pawm tawh a ni. Hemi avang hian thubuai pawh siamsak niin Corruption Investigation Office for High-ranking Officials (CIO) chuan a chhui chiang mek a, kar liam ta Nilaini khan man a ni.

Investigator-te chuan man a nih hnuah President hi a thubuai hmachhawn tir turin ni 20 hun an nei a, hemi chhunga an tih fel hman a ngai ang. Mahse a hren hun pawhsei a nih leh tak avangin, Yoon-a lawyer Yun Gap-geun chaun President hian CIO thu zawhfiah tur pawh a lo hnar thei niin a sawi.

Nimina court-in Yoon hren hun a pawhsei avanga lungawi loin, amah thlawltu mi tam tak chu court house pawn lamah an pungkhawm a, ṭhenkhat chu building chhungah an lut bawk. An zinga mi eng emaw zat chu police-ten an man a ni.

Acting president Choi Sang-mok chuan tharum thawhna thleng chu pawi a tih thu sawiin, hetiang thil hi democracy rama thleng tur a ni lo tiin, thuneitute chuan venhimna lam an uluk leh tih khauh zual a ngai a ni, a ti.