Thailand-a bomb puakah mi pali an thi

Thailand rama bomb puak vang≠in mi pali an thi a, mi dang tam takin hliam an tuar.

Ningani zan khan Hua Hin resort-ah bomb pahnih a puak a, nimin zing khan Phuket-ah ṭum hnih bomb puak lehin hemi hnu lawk hian chhim lama Trang leh Surat Thani province-ah bomb hi tihpuah a ni leh bawk. Bomb tihpuahna hmunte hi khualzinte tlawh tam hmun leh an awm duhna a ni.

Police-te chuan hmun hrang hranga bomb puaktute hian inzawmna an neih leh neih loh an chhui chiang mek tih an sawi. Eng pawl mahin bomb tipuaktu an nih thu an la sawi lo.

Prime Minister Prayut Chan-o-Cha chuan mipuite chu chiai lo turin a ngen a, bomb tihpuahchhan leh a tipuaktute chu hriat an la ni lo tih a sawi. Chanchinbu mite a kawmnaah, PM chuan kar kaltaa mipuiten sipai sorkar kaihhruaiin an ram danpui thar tur an pawmpui hnuah mipuite tihchiai leh buaina siam duhten bomb hi an tipuak nia a rin thu a sawi. An ram dinhmun siamṭha tura hma an la mek a, economy leh tourism lam pawhin hma a sawn mek laia pawikhawihna thlentute chu zawnchhuah ngei an ni dawn tih a sawi.

Ningani zana Hua Hin-a bomb pahnih puak hi pangpar pot-ah kam an ni a, bomb hmasa zawk tihpuah a nih aṭanga darkar chanve hnuah a pahnihna hi a puak leh a ni. Bomb puahna hmun hi ramdang khualzin mite tamna bar area-ah a ni.

Hua Hin hi Thailand khawpui, Bangkok chhim lam km 200 vela hlaa awm a ni, Thailand lal chhungkuate nipui in awmna hmun a ni a. Bomb hi lalnu Queen Sirikit-i piancham vawi 84 thlen hma niin tihpuah a ni.

Thailand ramah hian tourism industry hi a lian hle a, an sum lakluhna lian tak pakhat a tling. Kumin chhungin ramdang aṭanga khualzin tlawhtu hi mi maktaduai 32 vel an tlin beisei a ni.

Tualchhung politics buaina thleng ṭhin avangin Thailand-ah hian bomb puak na lo chi tihpuah a ni fo a, mahse kum 2014-a sipai chakna hmanga sorkar paihthlak a nih hnua sipai rorelna hnuaiah an awm aṭangin hetiang pawikhawihna hi a thleng khat tawh hle.