An hruaitute aiin Palestinian mite ka ngaihtuah zawk : Netanyahu

Israel Prime Minister Benjamin Netanyahu chuan Palestinian mipuite chu an hnam hruaitute aiin a ngaihsak zawk niin a sawi.

Netanyahu chuan Palestinian mite chu Israel ram pawhin a ngaihsak zawk a ni tiin online video a tihchhuahah a sawi.

Gaza Strip-a roreltu, Islamic Hamas pawlten charity leh United Nations-in Palestinian mipuite chhawmdawlna an pek tur an ruksak chungchang a sawinaah he thu hi Israel PM chuan a sawichhuak a ni.

August 4 khan Israel court chuan Gaza-a chhawmdawl hna thawktu, World Vision hotu Mohammed al-Halabi chu Hamas firfiak pawl ṭanpuina atana charity sum pawtpeng ṭhinah puhin thubuai a lo siamsak tawh a ni. Hei bakah hian UN engineer pakhat chu Hamas military wing thawhpuiah puh a ni bawk.

Netanyahu chuan, "Hamas firfiak pawl hian humanitarian organisation - World Vision leh United Nations sum tam tak an ruksak a ni" a ti. Hei vang hian Gaza Strip-a cheng, Palestinian mi tam tak, dinhmun harsa taka dingte chuan chhawmdawlna an hmuh theih loh phah niin a sawi.

Israel security service chuan nikum chhung khan World Vision-in Gaza Strip-a chengte chhawmdawlna tura a sum pek hi kum khatah dollar maktaduai sarih vel chu Hamas firfiak pawl tan hian an pawtpeng niin a sawi. World Vision chuan hemi chungchang hi a ngai thutak hle a, a chhui chiang dawn tih a sawi.