IS-ten civil mi 2,000 chuang man

Islamic State (IS) firfiak pawl chuan Syria ram hmarlam, Manbej khua aṭanga an tlanchhiat pahin civil mi 2,000 vel an man niin monitory group chuan a tarlang.

Syrian Observatory for Human Rights chuan Zirtawpni khan Aleppo province hmarlama Manbej khua aṭang hian, IS firfiak leh civil mite phurtu motor 500 vel chuan Aleppo province veka, Jarablus khua an pan tih a sawi.

Observatory chuan kumin June thla aṭang khan Manbej aṭanga IS-te umchhuak tur hian, Kurdish kaihhruai Syrian Democratic Forces (SDF) chuan US puihnain beihpui an thlak a, hei vang hian firfiakte hi an tlanchhe chhuak ta a ni. Mahse Jarablus pana an tlanchhiat dawn hian an himna tura inphenna atan khawchhung mi 2,000 vel an man tel a, civil mi tlanchhiat tumte chu an kap zui nia sawi a ni bawk.

Kurdish Syria Democratic Forces hotu Nasser Haj Mansour chuan, Manbej khaw pum an thuneihna hnuaiah a awm tawh tih sawiin, IS mi leh sa chambang an la awm leh awm loh an zawng mek tih a sawi. He khua hi Turkey ramri bul leh IS hoin an khawpui atana an hman, Raqqa khaw inkara awm a ni a, firfiakte chak lakna kalkawng pawimawh tak a ni.

Mansour chuan firfiak ṭhenkhat an man tih a sawi a, mahse a tam zawk chu an tlanchhe hman niin a sawi. Manbej chhehvelah pawh firfiakte lakah beihpui an thlak chhunzawm zel dawn tih a sawi bawk.

Nikum July thlaa IS-ten an lak, Tal Abyad an chan leh hnuah Manbej khua laklet sak an nih leh tak avangin hian firfiakten an hrenbeh, civil mi tam tak chu an zalen thei dawn niin Observatory chuan a sawi. SDF ten beihpui an thlaknaah hian mi 450 velin nunna an chan a ni.

Tun hnaiah hian IS te chu Syria leh Iraq-ah hnehin an awm fo a, sipaite chuan Anbar province
aṭangin Ramadi leh Fallujah khua-te chu an lak let sak tawh a ni. Heti chung hian IS hian Syria rama hmun zau tak an la thunun a, Iraq-a khawpui lian pahnihna Mosul pawh an kutah ala awm bawk.