New York-ah Islam hruaitu kaphlum

US-a New York khawpuiah kar kalta Inrinni khan chhun en laiin Bangladesh mi, Islam hruaitu leh a assistant chu kahhlum an ni. Tualchhung mite chuan he pawikhawihna thleng hi Republican presidential nominee Donald Trump-a'n mipuite rilru-ah Islam hlauh leh rinhlelhna a tuh vang niin an puh.

Imam Maulana Akonjee leh a assistant Thara Uddin-te hi Al-Furqan Jame Mosque-a an ṭawngṭai zo, in lam pana an haw laiin an hnung lam aṭangin mi pakhatin a kap a, Akonjee hi a hmunah a thi nghal a, Uddin hi damdawi-inah hruai ni mah se, darkar li hnuah a hliam tuar loin a thi ve leh a ni.

Pawikhawihna thlen hnu hian Bangalesh mite chu pungkhawmin an dem thu an sawi a, an zinga mi Khairul Islam chuan, "Hei hi America ram awm≠dan a ni ngai lo, a mawhphurtu chu Donald Trump a ni. Mipuite rilru ti chiaiin, Islam hlauhna a tuh a ni" a ti.

CCTV-a a landanin pawikhawihna thlen hun hi chawhnu dar 1.55 a ni a, Akonjee leh Uddin-te kaptu hi a tlanchhe zui nghal a ni. Mita hmutute chuan pawikhawihtu hi Hispanic niin, handgun lian tak a keng niin an sawi.