Turkey sorkarin mi 82,000 hrem tawh

Turkey sorkar chuan sipai chakna hmanga sorkar paihthlak tuma beihnaa inhnamhnawiha puh mi 82,000 zet a hrem tawh.

Sorkar beitua puhte chunga beihpui a thlak danah Turkey President Recep Tayyip Erdogan-a chu a che na lutuk nia sawiin khawthlang ramte chuan an dem thu an sawi.

Prime Minister Binali Yildiram chuan, July thlaa sorkar paihthlak tuma beih a nih aṭang khan he thila inhnamhnawih sorkar hnathawk 5,000 chu ban an ni tawh a, midang 77,000 pawh suspend an ni tawh tih a sawi. Hnathawk ban zinga 3,000 chuang hi sipai an ni.

Sorkarin a ban leh a hremte hi sorkar paithhlak tumnaa bultumtu bera puh, Islam hruaitu Fethullah Gulen-a nena inkaihhnawihna nei nia puhte an ni. President Erdogan-a thawhpui ṭhin, Gulen-a hi US-ah tlanchhiain Pennsylvania-ah a khawsa mek a, he hmun aṭang hian khawvel ram hrang hrangah a foundation-in a din, charity leh school-te a enkawl a ni. Gulen chuan Turkey sorakrin a puhna hi thu dik lo a nih thu leh, sorkar paihthlak tumnaah inhnamhnawihna a neih loh thu a sawi.

Turkey chuan Gulen hi an rama thawn kir turin US hnenah ngenna pawh a siam tawh a, an inbiakna pawhin hma a sawn zel niin Yildiram chuan a sawi. Istanbul chief prosecutor office chuan US thuneitute hnenah Gulen hi man tura ngenna a thawn ve leh bawk.