Colombia-a inbeihna thlengah mi 80 an thi tawh

Colombia ram hmar lama inbeihna thleng vangin ni thum chhungin mi 80 an thi tawh.

National Liberation Army (ELN) armed group chuan Catumbo region-ah kar liam ta Ningani aṭang khan an hmelma, kum 2017-a ṭhiah tak, Marxist Revolutionary Armed Forces of Colombia (FARC) member hluite an bei a, nimin thleng khan an la inbei chhunzawm a ni.

Pawl pahnihte inbeihna hi civil miten an tuar tel a, Pathianni thleng khan mi 80 an thi tawh niin Norte de Santander governor, William Villamizar chuan a sawi. Villamizar chuan inbeihna thleng vang hian mi tam takin hliam an tuar bakah, mi 5,000 vel chu hmun him lamah an tlanchhia niin a sawi bawk.

ELN hian tun hnaiah khawvela cocaine siamtu pawl lian ber nia sawi, Gulf Clan pawh beiin, Columbia hmarlama an inbeihnaah mi pakua an thi tawh bawk a ni. He thil thleng vang hian Colombia president Gustavo Petro chuan ELN nena inremna zawnga inbiakna neihna tura hmalakna pawh a tih tawp phah bawk a ni. ELN hi member 5,800 vel niin, Colombia-a armed group lian ber zinga mi an ni a, Colombia-a sorkar panga nen inremna kawng zawngin inbiakna lo nei tawh mah se, tun thlengin inremna an la siam thei lo. Sorkar laipui nena inbiakna an neih mek pawh, nikuma military base an neih avangin tih tawp a lo ni tawh a ni.