China siam Covid-19 vaccine chu Novem-ber-ah peih hman tum

Covid-19 vaccine an siam chu kumin November thla hian  mipuite hman theih tura peih fel hman an tum tih, China Centre for Disease Control and Prevention (CDC)-a official chuan a tarlang.

China hian Covid-19 vaccine pali chu clinical trial-a phase 3-na a neihpui mek aa, heng pali zinga pathum chu hnathawktute tan emergency-a hman theih turin chhawp chhuah a ni tawh. Phase 3 enchhina hi a kaltluang chho mek nia sawi a ni a, a hlawhtling a nih chuan November thlaah chuan mipuite hman theih tura ruahmanna kalpui a nih thu CDC-a chief biosafety expert Guizhen Wu chuan interview a neihnaah a sawi.

Wu hian kumin April thla khan Covid-19 vaccine an siam chu amah ngeiah enchhinna neih a nih thu a sawi a,  harsatna a neih phah lo niin a sawi bawk. Wu hnena vaccine enchhin hi China-in vaccine a siam pali zinga eng ber nge tih erawh tarlan a ni lo.

Pharmaceutical company China National Pharmaceutical Group (Sinopharm) leh Sinovac Biotech Ltd ṭangkawp chuan emergency atana hman turin Covid-19 vaccine pathum an siam chhuak a, a dang vaccine pakhat hi CanSino Biologics company siam a ni thung. CanSino Biologics vaccine siam hi China sipaite hman tura pawm a ni tawh bawk. 

Sinopharm company chuan July thla khan tluang taka phase 3 trial neih zawh a nih theih chuan, kumin kum tawp lama mipuite hman theih tura peih fel hman an tum thu an lo sawi tawh a ni.