Boko Haram-in an mi mante lanna video tichhuak

Nigeria helpawl, Boko Haram chuan kum hnih liamta Chibok-a school naupang hmeichhe tleirawl an rukbote lanna video thar chu Pathianni khan an tichhuak a, Nigeria sorkar chu an pawl mi leh sa an mante chhuah turin an phut.

Kum 2014, April thla khan Boko Haram-te hian Chibok school naupang, tleirawl 218 an rubo a ni. Video an tihchhuah tharah hian an rukbo zinga pakhat pa chuan a fanu pawh a lang niin a sawi a, lang zinga mi 10-te pawh chu a hriat thu a sawi.

Video-ah hian hel pakhat chuan an hmeichhe mante thleng nan hian sorkar chu Boko Haram hel a mante chhuah turin an phut tih a sawilang. Hel tang mekte chu chhuah an nih loh chuan hmeichhe tleirawl an kawlte chu sorkar chuan eng kawng mahin a chhan≠chhuak thei dawn lo tih a sawi bawk.

Hetihlai hian Nigeria President Muhammadu Buhari chuan Boko Haram pawl chu an dinhmun a chhe tawh hle tih sawiin, sorkar chuan hmeichhe rukbote chhanchhuah tum hian theihtawp a chhuah mek zel a ni, a ti.

Video hi minute 11-a rei a ni a, thusawitu chuan hmeichhe tleirawl an man zinga 40 chuan pasal an nei tawh a, an zinga
ṭhenkhat chu an awmna hmun beih a nih avangin an thi tawh niin a sawi. Hmeichhe an man zinga pakhat, Maida Yakubu inti pawhin thu a sawi a, Nigeria sipaiten an awmna hmun an bomb thute a sawi.