Ban-a'n UN hotu thar atan hmeichhia duh

United Nations Secretary General Ban Ki-moon chuan UN hruaitu thar atan hmeichhia awm se a duh thu a sawi.

Ban Ki-moon hian UN hotu hna term hnih a chelhna hi kumin December 31 hian a hmang zo dawn. UN hi kum 70 chuang liam taa din a nih aṭang khan, a hotu-ah hian mipa hlir an la awm a, mipa pariat in an kaihruai tawh a ni.

UN hotu thar atana Ban-a thlak tur hian candidate 11 an awm mek a, mipa paruk leh hmeichhia panga an ni.

Ban chuan UN hotu thar atan hmeichhia awm se a duh thu a sawi chu a mimal ngaihdan a ni tih a sawi a, ama thutlukna siam tur ni loin member ramte kut tur a ni, a ti.

Khawvelah hmeichhe hruaitu ropui tak tak, thil danglam thlen thei mi tam tak an awm a ni tiin, Ban chuan hruaitu thar atan hian hmeichhia ni thei se a duh tih a sawi. General Assembly-in candidate-te tana public hearing a buatsaih chu fakawm a tih thu a sawi bawk.

UN hotu hna hi khawvela region hrang hrangten an inchelh chhawk ṭhin a, Asia, Africa, Latin America leh Western Europe aṭangin he dinhmun hi an chelh tawh a, hetihlai hian Easter Europe leh Russi chuan secretary-general hi an la nei ve ngai lo a, an hun a ni ve tawh niin an sawi.

Security Council chuan informal poll ṭum hnih a buatsaih tawh a, hengah hian hmeichhe candidate te an la che ṭha vak lo a, a che ṭha berin pathumna a hauh pha chauh a ni. Vote lak ṭum hnih buatsaihah hian Portugal Prime Minister hlui, Antonio Guterres chu a la sang ber ve ve a ni.