US sipai hotuin SKorea tlawh dawn

US Army chief of staff, General Mark Milley chu ni thum cham turin vawiin hian South Korea-ah a zin dawn a, SKorea sipai hotute meeting a neihpui ang.

US leh SKorea-in South leh North Korea ramri bul, SKorea ram china Terminal High Altitude Area Defense (THAAD) system a dah tur chungchanga hma lak tawh dante US sipai hotu hi hrilh a ni ang. Tun ṭum hi nikum August thlaa US Army chief of staff a nih hnuah SKorea a tlawh vawi hnihna tur a ni. Mark Milley hian South Korea bakah China leh Japan pawh a tlawh nghal dawn a ni.

SKorea chhim chhak lam ramri bula US leh SKorea-in THAAD system dah a tum hi NKorea chuan na takin a sawisel a, China leh Russia pawhin an duh loh thu an sawi bawk. Civic group activist leh eptu pawlte pawhin an dodal nasa hle.

Gen Milley hian Korean Peninsula-a US sipai awmte a tlawh nghal dawn bawk a ni. Hei hi tun thla chhunga US general leh admiral-ten peninsula an tlawh ṭum li-na tur a ni. Kar hmasa khan US Army Pacific commander Gen Robert Brown chuan THAAD system enkawltu tur, 8th Army-a 35th Air Defence Artillery Brigade a lo tlawh bawk.