IS-te hneh turin Trump-a'n NATO thawhpui tiam

US Republican presidential candidate Donald Trump chuan President atana thlan tlin a nih chuan, Islamic State (IS) firfiakte hneh ngei turin North Atlantic Treaty Organization (NATO) chu ṭha taka thawhpui a tiam. Hemi hma hian Trump hian US chuan NATO-in ti tura a phut ang chu a tikher lo ang tiin a lo sawi tawh a ni.

A foreign policy chungchang a sawinaah, Donald Trump chuan IS lakah hian cyber, military leh financial war a puang dawn tih a sawi a, mahse he indona hi eng anga kalpui nge a tum tih erawh a sawi lang lo. Hemi atan hian NATO chu ṭha taka a thawhpui tur thu a sawi. Trump chuan NATO-in firfiakte beiletna tura kalphung thar a siam avangin a ngaihdan pawh a thlak niin a sawi bawk.

US-a Muslim pem lutte khuahkhirhna siam a rawt chungchang pawh sawichhuak lehin, President a nih chuan Muslim pem luh tumte chu US beih tumte manchhuah an nih theih nan uluk taka screening test, Trump Ideological Test (TIT) neih tir vek a tum thu a sawi. Firfiakte tamna ram aṭanga kalte chu an rama pem luh khap lailawkna pawh siam a tum tih a sawi.

Kumtinin Middle East aṭangin US-ah awmngheh tuma pem lut mi 100,000 vel a awm ziah a, Middle East aṭang vek hian awm nghet tur ni lo, hnathawk tura kal mi sing tel an awm ziah bawk niin Trump chuan a tarlang. Heng bialte hi an him ngei tih hriatchian a nih phawt loh chuan visa pek chhuah pawh tihtawp lailawk a ni ang, a ti.