Ṭangrual ramten Yemen-a hospital bomb

Yemen helpawl laka beihpui thlak mektu, Saudi Arabia kaihhruai ṭangrual ramte chuan Thawhlehni khan hospital an bomb a, mi 11 an thi.

Paris-a hmunpui nei, Doctors Without Borders (MSF) chuan Yemen hmar thlang lam, helho kuta awm mek, Hajja province-a Abs hospital chu Thawhlehni tlai dar 3.45 vel khan beih a nih thu a sawi. Mi 11 an thih bakah mi dang 20 in hliam an tuar niin a tarlang. Thi zingah hian MSF staff pawh an tel a ni.

MSF chuan kum khat chhungin Yemen rama an hmun beih a nih ṭum li-na a nih thu a tarlang. Yemen-a MSF Ememergy Unit hotu, Teresa Sancristoval chuan thuchhuah siamin, "Damlo eng emaw zat enkawl mekna leh MSF national leh international staff-te awmna hospital beih a ni leh hi damlo leh medical facility zah lohna lian tak a ni" a ti. Hospital awmna hmun chu helpawl leh sorkar lai aiawhte bakah, Saudi kaihhruai
ṭangrual ramte pawh hriattir fo niin a sawi.

Kum 2015 March thla aṭanga khan Yemen sorkar laka hel, Houthi hel beihletnaah Yemen sorkar puiin, Saudi Arabia kaihhruai Arab ṭangrual ramte hian beihpui an thlak a ni. Houthi helte hian Yemen khawpui, Sanaa bakah ramchhung hmun dang eng emaw zat an la tawh a ni.

Ṭangrual ramten beihpui an thlaknaah hian civil mite an bei tel fo niin complain a awm fo a, kar kalta kartawp lama Saad province school an beihnaah pawh naupang 10 an thi tel niin MSF chuan a sawi. Mahse ṭang≠rual ramte chuan school an bei lo tih sawiin, helhoin an pawl tana thawk tura naupang training an pekna hmun an bomb zawk niin a sawi.

An khua hi ṭangrual ramte hian ni eng emaw zat an bei tawh a ni. He khua hi SAudai Arabia ramri-a Harad khaw bula awm a ni a, heta ṭang hian helho hian civil mi leh security force-te an bei fo a ni. Harad khuaah pawh hian helho leh Yemen sorkar sipaite an inbei mek bawk.