Israel-ah dan loin nitin Palestinian mi 50,000 an lut

Israel Defence Force hotu Gadi Eisenkot chuan an ramah dan loin nitin Palestinian mi 50,000 vel an lut ṭhin nia sawiin, hemi veng tur hian West Bank nena an inkar hungna chu siam zo thuai turin roreltute a ngen. Hei hian an ram chhunga firfiakte pawikhawihna thlen ṭhin pawh a tihtlem phah dawn a ni, a ti.

Knesset State Control Committee meeting-ah hemi chungchang hi sawiin, Eisenkot chuan an inhungna bang ṭha tawk lo chuan Israel himna thlengin a tiderthawng a ni, a ti.

Dan loa Palestinian mi 50,000 lut ṭhinte bakah, Israel ramah hian luh phalna nei mi 100,000 vel chu nitin an lut bawk niin Eisenkot chuan a sawi a, phalna neite hi tunhnaia an rama pawikhawihna thlengah an inhnamhnawih ve ngai lo niin a sawi.

Eisenkot chuan West Bank nena an inrina la hung loh, kilometer 100 vela thui a la awm tih sawiin, venhim ngai zual, Jerusalem chhim lama Gush Eztion biala bang siamna tur hian sum tam tak a ngai dawn tih a sawi.

Eisenkot chuan Palestinian mite hnena permit an pek dan kalphung chu siamṭhat a rawt a, Israel sumdawng zingah phalna nei loa lut Palestinian mite hnathawka chhawr chu na taka hrem a rawt bawk. Police hotu chuan an ram chhungah Palestinian-ten Israel mite an beih fo avangin venhimna khauh zawka kalpui a ngai a ni, a ti.

Hetih lai hian West Bank chhimlama refugee camp-ah Israel sipai leh Palestinian-te intihbuai avangin mi 25-in hliam an tuar. Red Crecent medics chuan hliam tuar zinga ṭhenkhat hi silai muin a fuh te, rubber bullet-a kahfuhte an ni tih a sawi.

Israel sipaite hian Hebron khaw bula Al-Fawwar camp dap turin an kal a, an dap hnuah camp awmna bangte an tichhia a ni. He camp-ah hian mi 10,000 vel an khawsa mek a ni.

Israel army thupuangtu chuan sipaite hian camp chhunga ral≠thuam thuhrukte an dap niin a sawi a, handgun pahnih leh silai mu bakah, hmanraw dang pawh an man tel a ni, a ti. Palestinian mi eng emaw zat chuan sipaite lo dan tum hian IED an lo vawm bakah, lungin an lo tawng niin a sawi. Sipaite hian anmahni beitute hnawhdarh nan hian silaite an hmetpuak ve bawk.

Sipaite hian Palestinian mi pakhatin Israel car bei a, driver a thihphah avangin thla hmasa khan ni 26 chhung chu Fawwar camp hi an lo kharsak tawh a, ralthuam siam≠na Palestinian workshop awmte an dap zui bawk a ni.