Ukraine beihnaah NKorea sipai 1,000 thi tawh

Russia leh Ukraine indona thleng meka Russia sipaite pui tura tirh, North Korea sipai zinga 1,000 vel chu Russia khawthlang lam, Kursk bialah Ukraine nen an inbeihnaha an thi tawh niin khawthlang lam official-te chuan an sawi.

North Korea aṭang hian Russia pui turin sipai 11,000 vel tirh nia sawi a ni. Thi, hliam leh chin hriat loh bakah man hi 4,000 vel tling tawhin, an zinga 1,000 chu indona hmunah an thi nia sawi a ni. Hliam te enkawl an nih leh nih loh pawh hriatchian an ni lo bawk.

Russia pui tura tirh, NKorea sipaite hi an elite unit, Storm Corps amite an ni a, Russia-ah hun rei lo te chauh training an neih hnuah indona hmunah hian an kal nghal a ni.

British Army tank commander hlui, Col Hamish de Bretton-Gordon chuan NKorea sipaite chu an thihna tur lam pantir an ni tiin, Russia sipaite chuan eng ang nge an tawn dawn tih pawh an ngaihven pui tak tak lo niin a sawi.

Ukraine hian nikum August thla aṭang khan Russia-a Kursk bial vengtu Russia sipaite chu beiin, he bial hi an luh chilh a ni. Hei vang hian Ukraine sipaite nawr kir tur hian NKorea sipaite hi tirh an ni ta nia sawi a ni. Ukraine sipaite hi an hnungtawlh leh deuh a, heti chung hian Russia ram bial chin kilometer eng emaw zat chu an la chelh chhunzawm thei a ni.