NKorea-in Russia-ah sipai thawn belh tum

Russia-in Ukraine a do meknaa pui tura North Korea-in sipai tam tham tak a tirh zingah 1,000 chuang an thi tawh nia sawi a nih hnuah, NKorea chuan Russia pui turin sipai tirh belh leh a tum niin South Korea military chuan nimin khan a tarlang.

South Korea joint chief of staff (JCS) chuan hemi chungchanga thuchhuah an siamah, "Russia-Ukraine indonaa tel tura sipai a tirh aṭangin thla li a liam tawh a, North Korea sipai zingah thi leh man tam tak an awm tawh bawk. Mahse heti chung hian sipai dang tirh belh leh tumin a in buatsaih mek a ni," a ti.

Hei bakah NKorea hi spy satellite leh intercontinental ballistic missile (ICBM) kap chhuah turin a inbuatsaih mek niin JCS chuan a sawi bawk.

North Korea hian Russia pui turin sipai 11,000 vel a thawn a, heng sipaite hi Russia ramah hun rei vak lo training pek an nih hnuah, Ukraine do turin Russia khawthlang lam, Kursk bialah dah an ni. He hmunah Ukraine sipaite nena an indonaah North Korea sipai thi leh hliam hi 3,000 chuang an awm tawh niin Ukraine lam chuan a sawi.

Hetih lai hian Russia leh NKorea chuan indonaa tel tura NKorea sipai thawn an nih thu hi thu dik lo niin an la sawi reng thung. Russia president Vladmir Putin chuan an ramah NKorea sipaite an kal thu hi chu a pha lo a, mahse indona hmunah tirh an ni lo niin a sawi. NKorea official pawhin indonaa tirh an nih dawn chuan dan ang thlapa tih a ni ang, tiin a sawi ve bawk.