IS nena inzawmna nei media account chhui dawn

Europe-a police-te chuan firfiak pawl, Islamic State (IS) nena inzawmna nei social media account-te an chhui dawn a, an chhui chhuahte chu an block nghal dawn a ni.

Tun hnaia US in a zir chiannaah Twitter-a account 46,000 vel chu firfiak pawl nena inzawm niin a sawi a, heng zinga account eng emaw zat hi IS member thar lakna hmanruaa hman a ni.

Firfiak pawl nena inzawmna neite chhui hna hi European police agency, Europol in a thawk dawn a, social media company te nen an thawkho ang. Mahse company-te hming hi an puangzar duh lo.

IS nena inzawm account an zawnnaah hian, account siam thar aṭanga darkar hnih hnu lekah tihtawp lehte chu a siamtute zawnchhuah an tum dawn a ni. Europol chuan EU mi 5,000 vel chu IS ho ram luah chinah hian an lut tawh niin a ring.

Europol director, Rob Wainwright chuan team thar hian July 1 aṭangin hna a thawk ṭan dawn tih a sawi. Hemirual hian IS nena inzawmna nei, social media account zawng zawng chhui chhuah chu hna hautak tak tur a nih thu a sawi.

Washington-a Brookings Institution chuan IS nena inzawmna nei, Twitter account hi 90,000 zet awma a rin thu a sawi.