Biak in hal duh lohna lantirin Israel-ah kawng zawh

Israel hmarlama Church of the Multiplication of the Loaves and Fish halsak a nih avanga lungawi lohna lantirin, Pathianni khan Jerusalem-ah Kristiante'n kawng an zawh.

Church of the Multiplication of the Loaves and Fish hi Galili dil kama Isua Krista'n a dam laia thil mak a tihna, chhangper panga leh sangha pahnih hmanga mipui 5,000 a hraina hmuna sak kha a ni. He biak-in hi Juda firfiakte nia rinte'n kar hmasa khan an hal a ni.

Pathiannia kawngzawhte hian kraws chhinchhiahnate kengin, a rang thei anga bera pawikhawihtute man turin Israel sorkar leh police-te an phut thu an sawi.

Order of Saint Benedict hotu, Abbot Gregory Collins chuan sakhaw hrang hrang betute hnenah biak-in beih a nih chu dem turin a ngen. "Kristian, Druze, Muslim leh Juda-te chuan hetianga sakhaw hmun pawimawh beih a ni hi an duh lohzia an lantir a ngai a ni. Hemirual hian Kristian kan nih angin, Kristiante tih dan tur ang takin kan lungawi lohna pawh hi kan lantir a ngai a ni," a ti.

Kar kalta Ningania Church of the Multiplication of the Loaves and Fish hal a nih ṭum hian bible leh prayer book-te a kang tel a, biak-in tlawhtute puala office an siam te, meeting room leh souvenir shop-te pawh a kang chhe tel a ni. Hei bakah hian biak-in bangah Hebrai ṭawngin an ziak râng a, milem beitute tichhiat an nih tur thute ziah a ni.

Israel President Reuven Rivlin chuan pawikhawihna thleng hi a dem thu sawiin, he thil thleng hi sakhaw hmun pawimawh beihna mai piah lamah, mipuite inkar boruak tihchhiat tumna a ni, a ti.

Rabbis for Human Rights, Israel rights watchdog chuan kum 2009 aṭang khan Israel leh West Bank-ah sakhaw hmun pawimawh beihna vawi 43 zet a thleng tiin a tarlang.