UAE leh Bahrain-in Israel inremna ziahpui ta
US hmalakna hnuaia Israel nena inlaichinna siam an remtih hnuah, Thawhlehni khan United Arab Emirates (UAE) leh Bahrain chuan Washington-ah Israel thawhpuina tur inremna hi an ziak fel ta.
US President Donald Trump chuan White House-ah inremna thuthlung ziahna hun hi a buatsaih sak a, White House lawn-a he hun hmanpui tura kal mi eng emaw zat hmaaah Israel prime minister Benjamin Netanyahu chuan UAE foreign minister Sheikh Abdullah bin Zayed al-Nahyan leh Bahriain foreign minister Abdullahtif al Zayani-te chu thawhdunna tur thuthlung a ziahpui a ni.
UAE leh Bahrain hi Arab ram zingah Israel thawhpui duh ram pathumna leh palina an ni. Kum 1979-ah Egypt leh 1994-ah Jordan ramten inremna an lo siampui tawh bawk.
Inremna an ziah hmain PM Netanyahu leh President Trump-te hi Oval Office-ah an inkawm a, Trump chuan Arab ram dang panga paruk vel pawhin Israel nena inremna siam hi an remtih leh thuai a beisei thu a sawi. Mahse eng ramte nge inbiakna a neihpui mek erawh a sawilang lo.
Hetih lai hian Arab ram pahnihten Israel inremna an siampui hi Palestinian-te chuan duh loin, Thawhlehni vek khan West Bank leh Gaza Strip-ah lungawi lohna an lantir. Palestinian Authority president Mahmoud Abbas chuan Israel-in Palestinian ram a luahsakte a chhuahsan phawt loh chuan Middle East-ah remna a awm thei dawn chuang lo tih a sawi.
UAE leh Bahrain-in Israel nena inzawmna siam an remti chu Palestinian mite leh, Middle East-a remna leh muanna a awm theihna atana hmalakna phatsannaah an ngai tih a sawi bawk.