Sudan-a hospital beihnaah mi 70 an thi

Sudan rama Darfur biala El Fasher khuaa hospital awmchhun, Saudi Teaching Maternal Hospital beihnaah mi 70 an thi niin nimin khan World Health Organisation (WHO) director general Tedros Adhanom Ghebreyesus chuan a sawi.

Hospital beitute hi helpawl, Rapid Support Forces (RSF) niin official-te chuan an sawi a, an pawl hian an tih a nih leh nih loh erawh an la sawichiang lo. Mahse tun hnaia Sudan sipai leh army chief, Gen Abdel-Fattah Burhan kaihhruai RSF an inbeih reng avangin, an inbeihna kal zelah he pawikhawihna hi a thleng nia ngaih a ni.

WHO chuan hospital beih chungchang hi social platform X-ah tarlangin, beih a nih lai hian damdawi-inah damlo enkawl lai tam tak an awm tih a sawi. Thite hi damlo bakah damlo awmpuite an ni tih sawiin, hliam tuar 19 an awm bawk a ni, a ti.

Kum 2019-a dictator Omar al-Bashir paihthlak a nih aṭang khan Sudan ram chhung dinhmun hi a la ṭha lo hle. Democracy din tuma hma lakna chuan awmzia a la nei thei lo a, RSF leh Sudan sipaite hian kum 2023 April thla aṭangin an inbei a, an inbeihna avang hian mi 28,000 chuangin himna zawngin an in leh lo an tlanchhiatsan tawh.