Japan Prime Minister thar atan Yoshihide Suga thlang

Japan-a rorellai party, Liberal Democratic Party (LDP) president Yoshihide Suga chu Japan prime minister atan nimin khan thlan a ni.

A hrisel loh avanga Japan prime minister bang ta, Shinzo Abe thlaktu tur hi nimin khan Parliament special session-ah a thlan a ni. He hunah hian ah thlanna neih a ni a, he hunah hian LDP president atana thlan thar, Yoshihide Suga chu Shinzo thlaktu atan thlan a ni a, kum 8 hnua Japan-in PM thar a neih leh hmasak ber a ni.

September 14  khan Suga hi Liberal Demo­cratic Party president atana thlan a ni a, nimin khan PM atan thlan a ni leh ta a ni. Suga hi  Shinzo Abe thlawptu niin, Abe hnuaiah kum 2012-2020 chhungin chief cabinet secretary hna a chelh ṭhin a, kum 2006-2007 inkar khan Minister of Internal Affairs and Communications hna a lo chelh tawh bawk. Kum 1996 khan Kanagawa 2nd district aṭangin  House of Representative atan thlan tlin a ni tawh.

Kum 71 mi Suga hian PM atana thlan tlin a ni chu lawmthu sawiin, sorkar hmasa agenda-te chu kalpui chhunzawm a tum thu a sawi.  

Hripui leng vangin Japan sum dinhmun pawh a tlakhniam phah hle a, hei vang hian PM thar tan pawh an ram sum dinhmun siamṭha turin a hmabak a ko nghal dawn hle. 

PM a nihna aṭanga a hrisel loh vanga bang ta Shinzo Abe chu Japan PM ni rei thei ber a ni a, kum 2012 December 26 aṭang khan PM a ni. Kumin August 28 khan a ban thu a puang. A term hi nakkum September-a tawp tur a ni.