UN Report Israel leh Palestinian-in dan an bawhchhia

United Nations (UN) report chuan kum 2014-a Gaza Strip-a an inbeihnaah Israel leh Palestinian chuan international humanitarian law leh international human rights law an bawhchhe ve ve tiin a tarlang.

UN report hi Thawhṭanni khan tihchhuah a ni. Report siamtu, United Nations Independent Commission of Inquiry chuan dan an bawhchhiat ṭhenkhat phei chu a pawi tham hle a, war crime anga ngaih theihte a awm a ni, a ti.

Kum 2014 nipui laia Gaza Strip-a Israel leh Palestinian helpawl, Hamas-te inbeihna avang khan chhungkaw 142 in an chhungkaw member pathum leh a aia tam an chan tiin report chuan a tarlang bawk.

Report chuan ni 51 an indo chhung hian Israel chuan Gaza-ah hian vawi 6,000 chuang zet thlawhtheihna hmangin bomb a thlak a, Palestinian mi 1,462 thi zinga hmun thuma ṭhena hmun khat hi naupang an ni, a ti. Commission chairman, Mary McGowan Davis chuan, "Chenna inte beih a nih avangin chhungkaw member a ruala thi eng emaw zat an awm a, he inbeihna hi a bikin naupangte'n an tuar nasa hle. Gaza-a inbeihna thleng avang hian naupang 550 an thi a ni," ti.