Japan-in club-a lâm khapna dan a hlip

Japan Parliament chuan an ram khawpui, Tokyo-a zan dar 12 hnu lama club-a lam huaihawt khapna dan a hlip. Hemi hmain Parliament hian vote thlak thei chin kum bihthliah, kum 20 tih chu kum 18-ah a lo tihniam tawh bawk.

Japan-in dan a hman mekah chuan ramchhunga dance club-te chu zan dar 12 hnuah an lam huaihawtte tihtawp vek tura tih a ni. He dan hi kum 1948-a siam a ni.

Kum 1960, 70 leh 80 chho-ah khan he dan hi thlahdul niin, khawpui liana club-te chuan zanlai pelh hnuah pawh lam hi an huaihawt a, thuneitu lam pawhin an ngaihmawh sak lem lo. Mahse kum 2010-a Osaka club-a insual buaina thlenga zirlai kum 22 mi a thih hnu khan police-te chuan dan hi khauh zawkin an kengkawh zui leh ta a ni.

Dan thar hi kum 2016, June thla aṭanga hman ṭan tur a ni. Mahse zan dar 12 hnu lama lam huaihawtna club-te chuan eng an nei ṭha tawk tur a ni a, an light level chu 10 lux tal a ni tur tih a ni.