South Carolina-in flag lakthlak a duh

US-a South Carolina state hruaitute chuan Columbia State House-a civil war hunlaia mi flag tar chu lakthlak an phut.

State hruaitute chuan Confederate battle flag tar chu ṭha an lo tih thu leh, chi inhuatna lantirna nia an ngaih thu an sawi.

South Carolina Go­ver­nor, Republican mem­ber Nikki Haley chuan flag chungchangah hian press conference koh a tum thu a sawi.

Kar kalta khan Char­leston khuaa mihang biak­-in, Emanuel African Methodist Episcopal Church chu silai keng pakhatin beiin biak-ina awmte chu a pawng kah a, mi pakua a kaphlum. Pawikhawihtu hi man ni tawhin, vun rawng inthliarna thlawptu a ni. He thil thlen hnu hian state chhunga sakhaw hruaitu, local official leh activist-te chuan Civil War hunlaia sal neih thlawptu lam flag intar chu lakthlak thuai an phut thu an sawi a ni.

State senator, Marlon Kimpson chuan flag hi lathla tura legislature-ah ngen a tum thu a sawi a, hemi rual hian state mipuite pawh an aiawha an thlante nawr turin a ngen bawk.

Mayor Joseph Riley chuan flag chu museum-ah dah chi a ni tawh tih a sawi a, "Hmanlai thil a ni tawh a, hei vang hian history museum-a dah zawk tur a ni," a ti. Confederate battle flag hi inhuatna lantirna a ni tiin, hnam hrang hrangte intluktlanna dodaltu, Ku Klux Klan (KKK) leh pawl dangte pawhn an lo hmang ṭhin a ni, a ti.

Hetihlai hian flag hi State House aṭanga la thla tur chuan legislature-in a a remtih a ngai a ni.

Kar kalta khan Co­lumbia-ah mi tam tak chu legislative building kawtah pungkhawmin flag lakthlak an phut a, MoveOn.org.activist group chuan internet kal­tlangin flag dahbo phutin petition a siam bawk a, Thawhṭanni thleng khan mi nuai nga chuangin hming an ziak.