SKorea-ah MERS vei an pung zel

South Korea ramah Middle East Respiratory Syndrome (MERS) vei pathum hmuh belh leh an ni a, heng mite nen hian hri vei hi mi 175 an tling tawh.

Health ministry chuan May 20-a an rama MERS hri vei hmuhchhuah a nih aṭang khan mi 27 in an thihpui tawh tih a sawi. Thi zinga a tam zawk hi kum upa lam leh, natna dang nei telte an ni. Hetihlai hian MERS vei enkawl zinga pali chu an damchiang tawh nia sawiin hospital aṭanga chhuahtir an ni tawh a, enkawl dam hi mi 54 an awm tawh bawk.

May thla aṭanga MERS an vei leh vei loh enfiah tura an dahhran tawh hi 3,883 aṭangin nimin khan mi 2,805 ah a tlahniam tawh a ni.

SKorea rama MERS hri leng vang hian June 1-18 chhung ringawt pawh khan an rama zin tum, ram dang mi 123,000 chuan zin an ṭhulh. An zinga a tam zawk hi China, Taiwan leh Hong Kong amite an ni. Hri leng vang hian zin tum tam takin an ṭhulh belh zel rin a ni bawk.

MERS hri hmuhchhuah ṭanna, Saudi Arabia-ah pawh tun hnaiah he hri vei mi pathum hmuhchhuah belh an ni. Saudi Ministry of Health (MOH) chuan heng mi pathumte hi hospital pahnih aṭanga hmuhchhuah an ni tih sawiin, an kai dan hi chhui chian mek a ni, a ti.

South Korea rama MERS vei hmuhchhuah tawh zinga a zahve dawn chu Seoul-a Samsung Medical Center aṭanga kai an ni. He damdawi-in neitu, Samsung Group vice chairman, Jay Y.Lee chuan nimin khan hri darh zel tur an dan theih loh avangin mipuite hnenah ngaihdam a dil. "Mipuite'n min beiseina leh rinna kan pha lo a ni," a ti. Theihtawp chhuaha thawh zel an tum thu a sawi nghal bawk.