Syria jail-ah kum 2011-15 chhungin mi 18,000 an thi

Human rights group, Amnesty International report chuan kum 2011 leh 2015 inkar chhungin, Syria rama jail hrang hrangah mi 18,000 vel an thi niin a tarlang a, jail chhungah innghaisak leh pawngsualte a thleng nasa hle tih a sawi.

Amnesty chuan jail tang chhuak mi 65-te an kawm tih sawiin, heng mite pawh hian nghaisak an tawk nasa hle a, jail leh dentention centre hrang hrangah tangte kut thlak an nih dan te an sawichhuak a ni.

Report a tihchhuah rual hian Amnesty chuan khawvel ram hrang hrangte chu Syria sorkar chu jail chhunga kut inthlak leh innghaisak thleng ṭhin titawp tura nawr turin a ngen nghal bawk. Mahse Syria sorkar chuan hetiang thil hi a thleng ngai lo niin a sawi.

Amnesty report, 'It breaks the human' tih hi nimin khan tihchhuah a ni a, hetah hian Syria jail tangten tihduhdah, natna leh thihna an tawh dante an tarlang a ni. Kum 2011, March thla aṭanga kum 2015, December thla inkar khan jail tang mi 17,723 an thi a, nitin jail chhungah mi 10 vel thi zel ang an ni. Tang lut tharte chu prison guard-te chuan 'welcome party' tia vuahin an lo sawisa nghal ṭhin niin a tarlang.

Jail tang chhuak an kawm zinga pakhat, Samer chuan, "Ransa angin min enkawl a ni. Mihring angin min en lo a, kut min thlak leh min tihhlum mai hrehna engmah an nei lo" a ti. Ziad pawhin intelligence agency detention centre pakhatah ventilation a ṭhat loh avangin ni khatah mi pasarih an thih thu a sawi a, tang vengtute chuan an zinga dam leh dam lo hriatnan an petkual niin a sawi.

Amnesty Middle East and North Africa Director Philip Luther chuan kum tam tak chhung Syria sipaite chuan anmahni eptute awpbehnan nghaisak an lo ching tawh a ni, a ti. Amnesty leh human rights group dangte chuan hemi chungchang hi international community chuan an sawiho a ngai a ni tiin, a bikin Syria tual≠chhung buaina thleng chungchanga peace-talk neih meka hruaitu, US leh Russia-te chuan an ngaihven a ngai a ni, an ti.