Duterte-a'n UN a sawisel

Philippine President Rodrigo Duterte chuan an rama ruihhlo do beihpui an thlak mek chung≠chang United Nations in a lo sawisel chu khak letin, an ram chhung inrelbawlnaa inrawlh lo turin a ti.

President Duterte rorelna hnuaia July 1 aṭanga ruihhlo do beihpui thlaknaah hian damdawi ti ṭhin leh dan loa damdawi zuar mi 600 tihhlum an ni tawh niin police-te chuan an sawi a, mahse local media chuan thi zat hi 1,000 an chuang tawh niin an tarlang thung. President hian damdawi zuar, police-ten man an tuma lo ṭang leh inpe duh mai lote chu kap mai turin a lo ti tawh a ni.

Duterte chuan UN chu Philippine sorkar hmalak dan sawi≠sel hma lutukah a puh a, hetihlai hian Middle East-a tualchhung buaina thleng reng chungchangah erawh a ngawi reng thung a ni, a ti.

UN Secretary-General Ban Ki-moon leh UN Office on Drugs and Crime chuan President Duterte-a'n ruihhlo leh pawikhawihna thleng ṭhin a dona kawnga police-te, mi kahhlum a phalsak chu an dem thu an lo sawi tawh a ni.

Hei hi chhang letin, Duterte chuan UN thiltih dan chu atthlak hle nia sawiin, mi sangkhat vel an thi a, an ram chu chhe ber anga chhuah an tum niin a sawi. An ram mipui nuai tel chu drugs-in a tibua tawh a, druga addict tam tak, mihring nunphung pangngai ang pawha khawsa thei lo tam tak an awm mek a ni, a ti.