Suu Kyi-in tuikhuah chungchang China hruaitu sawipui

China tlawha zin, Myanmar State Councellor Aung San Suu Kyi-i chuan nimin khan China Premier Li Keqiang hmuin, Myanmar rama dam project tihkhawtlai mek chungchangte a sawipui.

Myanmar ramah hian China puihnain dam project lian tham tak, dollar tluklehdingawn 3.6 man tur chu kalpui a ni a, mahse kum 2011 aṭang khan tualchhung miten an dodal avangin he project hi sorkar chuan a lo titawp lailawk a ni. Mahse sorkar thar a din leh hnuah he project hi thawh chhunzawm leh turin China chuan a nawr reng a ni.

Suu Kyi-i hian China President Xi Jinping pawh a kawm dawn a ni.

China hi Myanmar rama investment ti nasa ber ram niin, investor lian ber a ni mek bawk. Oil, gas pipeline, dams leh mining lam thlengin China hian investment a ti a, tunhnaiah China firm-te chuan contract lian tham tak tak an hmu bawk.

Hetihlai hian Myanmar chuan ramri katlanga dik lo taka sumdawnna kalpui ṭhin venna atan border gate-a single-stop inspection dah a tum. Hemi atan hian China leh Thailand ramte pawh an be mek niin Minister of Commerce Than Myint chuan a sawi.

Single-stop inspection hmang hian dan loa bungrua lut leh chhuakte ven a ni dawn a, hei hian an ramin border trade aṭanga sum a hmuh pawh a pun phah sawt dawn niin tih Myint chuan a sawi. Border trade-a custom checkpoint-ahte chuan bungrua enfiahna atan X-ray machine te pawh dah tumin hma lak mek a ni, a ti. Ramri kaltlanga dik lo taka sumdawnna kalpuitu leh sumdawngte thurualpui theih staff-te chu hrem an ni zel dawn tih a sawi bawk.