US-in sum pek hmain tang chhuah turin Iran phut

Unitd State chuan Iran hnena a sum pek tur, dollar maktaduai 400 chu a pek hmain Iran sorkarin America mi tangte a chhuah hmasak phawt a nghak tih a sawi a, hemirual hian a sum pek hi tangte tlanchhuahna tur a ni lo tih a sawi nghal bawk.

Kumin January thla khan US-in Iran mi pasarih a mante a ngaihdam bakah, mi dang 14 manna tur thupek a tihchhuah pawh a lo sut tawh a, hemi avang hian Iran chuan America mi an man panga a chhuah a ni. Hemi hnu hian US chuan Iran hnenah hian dollar maktaduai 400 hu Swiss france leh euro chu Iran-ah hian phurh luh pui a, he hi a hmaa Iran-in sipai ralthuam chungchanga an leiba an la neihte tihfelna niin a sawi.

US hian January 17 khan pawisa hi a pe a, hemi hma ni chiah hian Iran leh world power ramte chuan nuclear deal an lo siam tawh a ni.

August thla tir khan State Department chuan Iran hnena sum pek leh tang an chhuahte hi inzawmna an nei loh thu a lo sawi tawh a, mahse hei hi Republican party lam chuan an awihsak lo thung.

Republican presidential candiate Donald Trump pawhin State Department thupuan chu thu dik lo a ni tiin, President Barack Obama chuan Iran hnenah dollar maktaduai 400 pek chungchangah dawt a sawi a ni, a ti. Trump chuan, "Tang tlanchhuahna tur a ni lo tiin President chuan a pha tlat a, mahse a ni ngei si a ni. Tang tlanchhuah nan sum kan pe ngai lo tih a sawi a, mahse a pe tho si a ni" a ti.