China President sawiseltu Kum 18 tang turin hrem

China President Ji Xinping sawiseltu, real estate Hua Yuan Property Conpany chairman hlui Ren Zhiqiang chu nimin khan eirukna thubuaiah kum 18 jail tang tura hrem a ni. Beijing court chuan Ren chungthu hi ngaihtuahin, eirukna, thamna la leh mipuite sum tichingpena puhnaah thiam loh a chantir a ni. Kum 18 tang tura hrem a nih bakah an ram pawisa, yuan maktaduai 4.2 chawi tura tih a ni bawk. 

Ren hi kumin March thlaa President Xi sawiselna thu a ziah hnu lawkah a chin hriat lohin a awm zui a ni. A thuziahah hian President Xi hi a hminghmerhin tarlang lo mah se, a mi sawi hi Xi a nih rin vek a ni thung. Beijing No 2 Intermediate People's Court chuan Ren hian thamna, US dollar maktaduai 1.25 a la nia sawiin, public fund yan maktaduai 50 dawn a tichingpen bawk niin a sawi. 

Ren hian a hmain China sorkar hi a lo sawisel fo tawh a, kum 2016 khan President Xi a sawisel avangin a micro­blogging accounts chu sorkarin a lo kharsak tawh bawk. State media-te chu mipui chhiah pek aṭanga enkawl an nih avangin, Communist Party leh Presidena tana thawk loin mipuite tan an thawk zawk tur a ni, tiin a sawi a ni.