Eptu ten Pakistan PM bang turin an phut

Pakistan eptu pawl intelkhawm, Pakistan Democratic Movement (PDM) chuan Pathianni khan multi-party meeting neiin, prime minister Imran Khan leh a kaihhruai sorkar ban phutin a huhoa nawrh huaihawt an rel. 

Meeting-a sorkar duh lohna lantir an rel hnu lawkah, mi tam tak chu chhuak khawmin sorkar duh lohna thuziakte an keng a, PM Khan chu bang turin an phut nghal bawk. Meeting-ah hian eptu hruaitu langsar Nawas Sharif, Maryam Nawaz leh Bilawal Bhutto Zardari-te an tel. 

Eptu hruaitute chuan kawng hrang hrang hmangin PM ban tir turin hma an la dawn tih an sawi a, Parliament-ah no-confidence motion put luh bakah, MP nihna aṭanga a ruala banna thehluh thlengin an inhuam tih an sawi. 

Meeting-ah hian point 26 awmna resolution an pass nghal a, heng zingah hian an ram politics-a sumdawngte inrawlh ṭhin titawp,  inthlan thianghlim leh felfai a awm theihna atana inthlan kalphung siamṭhat, inthlana armed force leh intelligence agency-te inrawlh tir loh, politics avanga tangte chhuah, journalist-te laka thubuai siam hnuhkir, National Action Plan hman, China-Pakistan Economic Corridor hnuaia project-te chak zawka thawk tura an phutna thu te a tel. 

Pathianni aṭanga sorkar laka lungawi lohna an lantir hi Bilawal Bhutto Zardari chuan an rama democracy chawi nun a nih theih nana kawng pawimawh tak a nih thu sawiin, PDM chuan Pakistan mite hnenah an zalenna, dikna leh an chanvote chu pek let a nih theih nana ruahmanna a siam thu Zardari chuan a sawi bawk.