Turkey-a inneihna hmuna bomb puakah mi 30 an thi

Turkey chhim lam, Gaziantep khuaa inneih lawmna hmuna bomb puak vangin mi 30 an thi a, mi 94 in hliam an tuar.

Gaziantep hi Syria ramri bula, Islamic State (IS) firfiakten awmhmun an khuarna bula awm a ni a, Syria mi raltlan tam tak an awm bawk.

Kar kalta Inrinni zan khan Gaziantep khaw chhimchhak lam, Sahin Bey district-a inneih lawmna hmunah thihchilh bomb hi tihpuah a ni a, bomb tipuaktu hi hriatchian la ni lo mah se President Recep Tayyip Erdogan chuan IS firfiakte tih ni ngeia a lan thu a sawi.

Bomb puahna hmun hi Kurdish hnam chenna bial a ni a, inneih lawmnaah pawh hian Kurds ho an tam hle nia sawi a ni.

Pawikhawihna a thlen hnua thuchhuah a siamah, President Erdogan chuan IS, Kurdish hel leh US-a awm mek, Islam cleric Fethullah Gulen-a zuitute chu danglamna an awm lo tih sawiin, heng miten an ram tihchhiat tuma an beihna chu an hlawhtling ngai dawn lo a ni, a ti.