Myanmar-in remna leh muanna a mamawh

China ram tlawha zin, Myanmar State Counselor Aung San Suu Kyi-i chuan Myanmar ram chuan remna leh muanna leh hnam hrang hrang inkara inlungrualna chu a mamawh ber a ni, a ti.

Suu Kyi-i hian China Premier Li Keqiang-a'n a sawmna chhangin, ni nga chamin China hi a tlawh a ni. Beijing-a chanchin thar lakhawmtute a kawmnaah, remna leh muanna an mamawh thu hi a sawi a, boruak ralmuang a awm loh chuan hmasawnna a awm theih loh thu a sawi.

Kum 1948-a Myanmar-in independence a hmuh aṭang khan an ramah hian chi bing helpawl hrang hrang an awm a, kum 2013 November thla aṭang khan sorkar chuan helpawl hrang hrangte chu inremna siampui turin inbiakna a neihpui ṭan a ni. Nikum khan Myanmar sorkar leh helpawl lian pariatte chuan inkahhai thuthlung an lo ziah tawh a ni.

Aung San Suu Kyi-i kaihruaiin kumin July 11 khan member 11 awmna National Reconciliation and Peace Centere (NRPC) chu sorkarin a din bawk. Sorkar chuan helpawl tam zawkte inremna siampui dan kawng zawngin 21th century Panglong meeting buatsaih leh a tum.

China leh Myanmar sorkar chuan sumdawnna leh thil danga an inkungkaihnate vawn nun zel an remti. Zirtawpnia Suu Kyi-i leh China President Xi Jinping-te inkawmnah, ram pahnihte inkara thil pawimawh hrang hrang an sawi dun. Meeting zawh hnu hian thuchhuah inṭawm siamin, sumdawnna lamah leh ramri bula helho vanga buaina awm ṭhin chungchangah thawhdun zel an remtih thu an sawi.

China President Xi Jinping chuan Myanmar rama mipui thlan sorkar a din tak vangin Myanmar mipuite tan pawh an hma lam hun a eng sawt hle tih a sawi a, inkungkaihna
ṭha tak nei turin ram pa≠hnih hruaitute chu an ṭan tlan a pawimawh tih Suu Kyi-i a hrilh.