Covid-19 vaccine sem dan turah WHO hnuaia thawhhonaah US leh China tel lo

Covid-19 vaccine siam chhuah a nih huna dose insem dan tur chungchanga thawk ho khawvel ram hrang hrang 156 zingah US leh China an tel ve lo.

World Health Organization (WHO) kaihhruaina hnuaiah Covid-19 vaccine, Covax siam chhuah a nih huna ram hrang hrang 156 te chuan dose insem dan tura ruahmanna siamah WHO chu an thawhpui tih an sawi a ni. Mahse an zingah hian khawvela ram lian  leh thil tithei pahnih, US leh Chian erawh an tel lo a ni. 

WHO director general Dr Tedros Adhanom Ghebreyesus chuan Covax chu dose tam tak siam tum a ni a, khawvela mi tam takin an ṭangkaipui dawn a ni, a ti. Covax hi nakkum kum tawp lamah peihfel hman an tum a ni. He scheme hian khawvela mipui hmun thuma ṭhena hmun hnih a huam thei dawn tih sawiin, charity a ni lo a, ram tin tana ṭhatna tur zawk a ni, a ti. 

Vaccine zirchianna leh siamna atan hian US dollar tluklehdingawn 1.4 siam a ni tawh a, mahse hei hi a la tawk lo a, hmanhmawh takin USD maktaduai 700-800 an la mamawh belh tih an sawi bawk. Hemi rual hian eng ramin nge sum hi pe tih erawh an sawi lang lo.