Israel-in Gaza hmar lama Palestinian mite kir phalsak

Israel sorkar chuan Gaza Strip-a inkahhai puanga inremna siam angin, nimin khan kum khat chuang hnuah a vawi khatna atan Gaza Strip chhim lamah Palestinian mite an kir a phalsak.

Gaza Strip-a Israel-Hamas indona avanga tlanchhia, Palestinian mi sang tel chu nimin khan Gaza hmar lamah hian an kir leh thei ta a ni. Palestinian mite hi Inrinni liam taa kir tura tih ruahman kha an ni a, mahse Hamas lamin Israel mi an hren mek, Arbel Yehud-i chhuah tur chungchangah inremna an lo siam tawh an zawm loh avangin Israel lamin an ti khawtlai ta a ni. Israel chuan Hamas hian an lo intiam tawh anga Inrinni liam taa sipai an chhuah rual chhuah ve tura tih, Yehud-i hi a tel lo tih an sawi.

Hemi hnu hian palai hna thawktu, Qatar chuan hma la nghalin, Hamas lam hian hren mek zinga mi, Israel sipai Agam Berger-i, Yehud-i leh mi dang pakhat chu chhuah an remti tih Pathianni zan khan a sawi. Israel prime minister Benjamin Netanyahu chuan heng mi pathumte hi January 30, 2025-ah chhuah an ni dawn a, February 1-ah mi dang pathum chhuah an ni leh dawn tih a sawi bawk. Hemi rual hian inremna an lo siam tawh palzut a nih chuan an enliam mai mai dawn lo tih sawiin, Hamas-in Israel mi an hrente chu a dam leh thi pawh hruai kir vek turin an bei zel dawn tih a tarlang.

Indona avanga tlanchhia, Palestnian mite hi kum khat chuang zet chu puan-in leh, school hrang hrangah te an khawsa a ni. An in lamah kir leh thei mah se, indona avangin an in leh lote erawh a chhe nasa hlawm hle thung. Hamas chuan an mi leh sate an kir leh thei chu hnehna ropui tak a ni tiin, hei hi Israel-in an ram luahsak tuma a beihna hnehna a ni, an ti.

Inremna an siam angin, Israel chuan central Gaza leh chhim lama tlanchhia, Palestinian nuai 6.5 vel chu Gaza hmar lama an kir a phalsak dawn a ni.Kea kal turte tan zing dar 7-ah Netzarim Corridor hawn a ni a, chawhma dar 9 aṭangin motor-a kal turte tan kawng dang hawn a ni bawk.

Gaza Strip-a inkahhai puanga inremna an siam thawh khatna hian March thla tir lam thleng a awh dawn. Hemi chhung hian Hamas hian an mi hren zinga 33 an chhuah ang a, Israel hian an ram jail hrang hranga tang Palestinian 2,000 dawn chhuah bawk ang. Hamas hian mi pasarih chhuah tawhin, Israel lam hiang tang 300 chuang an chhuah tawh bawk a, an zingah dam chhung tang tura hremna pek tawhte pawh an tel.