Congo helpawlin Goma khawpui an la tih sawi

Democratic Republic of Congo-a helpawl, M23 chuan an ram khawchhak lama khawpui pawimawh, Goma khua chu an la tih an sawi. Mahse sorkar lam chuan helpawl thusawi hi a pha thung.

Helpawl leh sipaite hi Pathianni khan Goma khuaah inbei lehin, darkar eng emaw zat hnuah helpawl hian khawpui hi an thununna hnuaiah a awm tih an sawi a ni.

DR Congo foreign minister chuan an ṭhenawm, Rwanda chu an ram laka indo puangah puhin, M23 hel pui turin sipai ṭhahnem tak an thawn niin a sawi. Rwanda sorkar chuan M23 pawl an thlawp thu hi a pha lo a, Rwanda sorkar paihthlak tumtu helte puiah Congo thuneitute hi an puh let ve bawk.

Kenya sorkar chuan inkahhai puang tura phutin, ni hnih hnu emergency regional summit an neihah Congo leh Rwanda president te hi an tel ve ve tur thu a sawi bawk.

M23 hian kum 2021 aṭang khan DR Congo khawchhak lam bial zau tak an thunun tawh a, kar rei vak lo liam ta aṭang khan an huang zauh tuma hma la chhunzawmin, Congo sipaite nen an inbei leh nasa tawh hle. Kkumin kumtir aṭang khan Rwanda ramri bul, North leh South Kovi-a inbeihna avangin mi nuai li chuang chu an tlanchhe tawh niin UN refugee agency chuan a tarlang.