Pakistan-ah khaw lum vanga thi 700 an tling

Pakistan rama khaw lum vanga thi chu nimin thleng khan mi 700 an tling tawh a, Karachi hospital hrang hrangah emergency puan a ni.

Khaw lum vanga thi zinga a tam zawk hi chhim lama Sindh province khawpui leh sumdawnna hmunpui, Karachi-a chengte an ni. Khaw lum lam hian degree celsius 45 a tling a ni.

Sindh province senior health official, Saeed Mangnejo chuan khaw lum vanga thi zat hi an la punchhoh a rin thu a sawi.

Karachi khawpui chhunga damdawi-in hrang hrangah khaw lum vanga taksa lama harsatna tawkte hi ṭhahnem tak enkawl mek an ni. Post Graduate Medical Col­lege Hospital-ah chuan mi 3,000 chuan enkawl an ni.

Khawpui chhungah hian power supply a tawp fo a, hei vang hian air condition a hman mumal theih loh bakah tui herh haw tur a awm lo fo.

Pakistan rama cheng, mi mak­taduai 200 zinga a tam ber chu Muslim sakhaw betute an ni. Muslim-te hian an thla serh, Ramadan thla an hmang mek a, ni chhuah leh ni tlak inkarah thil ei leh in reng reng khap a ni. Mahse sakhaw hruaitu ṭhenkhat chuan mipuite tan hriattirna tichhuakin, boruak nasa taka a lum chhoh avangin taksa lama chak lo zualte chu chaw ei phalsak an ni, an ti.

Province sorkar chuan mipuite chu pawn chhuak tam lo turin a ngen bawk.

Prime Minister Nawaz Sha­rif chuan National Disaster Manage­ment Authority leh pawl hrang hrang hnenah khaw lum tuartute ṭanpui nan ruahmanna a siam bawk a ni. Thawhlehni khan paramilitary Rangers force chuan Karachi khawpui hmun hrang hrangah medical camp a siam a, tui in tur thianghlim bakah damdawite an sem a ni.

Pakistan rama khaw lum vanga thi tam zawk hi kum upa lam leh mi rethei tak takte an ni a, an zinga a tam zawk chu chenna in nei lo, khawthlerah khawsa te an ni.