Nursing home kangah mi 16 an thi

Mexico ram hmar lama tar enkawlna inah kangmei a chhuak a, tar enkawl lai mi 16 an thi. Nursing home kan chhan hi hriatchian a la ni lo a, hal luih nia rin a ni.

Ramri bula Mexicali khuaa tar enkawlna in, Beautiful Dusk hi Nilaini zing khawvar hma deuh khan a kang a, mi 16 an thih bakah mi dang panga-in hliam an tuar a, chin hriat lohin pakhat a awm bawk.

Mexicali Mayor Jaime Diaz Ochoa chuan, in hi hal luih a ni em tih nursing home enkawltute'n an chhui chiang mek a ni, a ti. Nursing home enkawltu, civil association-te inkarah hian harsatna a awm mek a, hei nen hian inzawmna a nei em tihte pawh chhui chian a nih tur thu a sawi.

Beautiful Dusk nursing home-ah hian tar enkawl lai 44 an awm a, vanduaina a thlen hnu hian mi 23-te chu a bul hnaia nursing home dangah dah nghal an ni.

Mexico President Enrique Pena Nieto chuan thi chhungte a tuarpui thu a sawi a, vanduaina thlen dan chu chhui chian a ni dawn tih a sawi bawk.