Confederate flag siam chhunzawm dawn lo

US flag siamtute chuan Confederate bat­tle flag siam leh zawrh chhuah hna chu an chhun­zawm tawh dawn lo tih an sawi.

Confederate battle flag hi American Civil War lai, kum 1861-65 inkara sal neih thlawptu, con­­federate state-te flag hman ṭhin a ni. Hei vang hian mi tam tak chuan chi inthliar thlawpna lantirtu angah an la ngai a ni.

Kar hmasa khan South Carolina state-a Charleston khuaah mi­hang biak-in beih a ni a, mi pakua kahhlum an ni. He thil thleng vang hian state thuneitute chuan an state khawpui, Columbia State House-a Con­federate battle flag intar chu lakthlak an phut an ni.

Valley Forge Flag-a vice president of sales, Reggie VandenBosch chuan South Carolina-in State House-a Confe­derate flag zar lathla tura a nawr hnuah, he flag hi siam chhunzawm tawh lo an rel tih a sawi. He company hi kum 133 zet upa a ni tawh a, kumtinin flag hi maktaduai tel a hralhchhuak ṭhin.

New Jersey-a Annin Flagmakers pawhin Con­federate flag an siam chu an titawp tawh dawn tih an sawi bawk. Annin pawh hian kumtin flag mak­taduai 10 vel a siam a, heng zinga hian Con­fe­derate flag hi 1,000 vel an siam tel ṭhin a, Civil War lai khan Union sipaite hnenah flag hi a supply ṭhin. US President hlui Abraham Lincoln-a kuang tuamna flag pawh kha Annin company siam hi a ni.

Winsoncin-a Eder Flag Manufacturing pawh­in Charleston-a mi­hang biak-in beih a nih avang hian Confederate flag an siam leh zawrh chhuah hna chu an chawlh­san tawh dawn tih a sawi.