Sierra Leone-ah Ebola hri hmu thar leh

Africa khawthlang lama hri leng, Ebola chu hun eng emaw chen khuah­khirh a nih hnuah Sierra Leone khawpui, Freetown-ah a vei thar mi pahnih hmuhchhuah an ni.

Health official-te chuan Ebola hri vei an hmuh­te chenna hi mihring bitna lai a nih avangin a darh chak an hlauhthawn thu an sawi. Hei bakah hian Freetown hi Ebola laka fihlimah hun rei tak puan a lo nih tawh avangin khawpui chhunga Ebola veite dah hran a, enkawlna hmun an siamte pawh khar vek a ni.

Kum 2013, December thla aṭang khan Africa khawthlang ram hrang hrangah Ebola hri leng vang hian mi 11,000 chuang an thi tawh tawh a ni. Hri leng hluarna ramte chu Sierra Leone, Guinea leh Liberia-te an ni. Mahse hri khuahkhirh tura theihtawp chhuah a nih hnuin ziaawm lam a pan a, May thla khan Liberia ram chu Ebola laka fihlimah puan a lo ni tawh a ni. Sierra Leone-ah pawh hmarlam bial tih lohah chuan hri leng hi khuahkhirh tawh anga ngaih a ni bawk. Mahse Guinea ramah hi chuan a la leng reng a ni.

Guinera ramah chuan Ebola hri leng do letna kawnga sorkarin hma a lak nasat avangin malaria hri dona lam a ngaihthah tiin mithiamte'n an sawi. Hei vang hian kum 2014 chhung khan malaria vei mi 74,000 vel chu enkawl mumal lohin an awm. US mithiamte chuan malaria hri vanga thi hi an tam phah a hlauhawm thu an sawi.