Boston marathon-a bomb tipuaktu thi turin hrem

US federal judge chuan kum 2013-a Boston Marathon neihna hmuna bomb tipuaktu, Dzhokhar Tsar­naev chu thi turin a chungthu a relsak.

Federal judge-in court thu­­­tlukna a puanchhuah hma hian, kum 21 mi Tsarnaev chuan kum 2013, April thlaa marathon neihnaa a u, Tamerlan Tsarnaeve nena bomb an tihpuah tuartute hnenah ngaihdam a dil. He bomb puak vang hian mi pathum an thi a, mi dang 264 in hliam an tuar.

Boston court-a hruai a nih hnuin Dzokhar Tsarnaev chuan, "Bomb puak vanga thi leh hliam tuarte chungah ngaihdam ka dil a ni," tiin a sawi. "Mi nunna ka laksak avangin pawi ka ti a, siam­ṭhat theih tawh loh thilsual ka tih avangin pawi ka ti hle a ni," a ti.

Pawikhawihna an thlen lai hian Tsarnaev hi kum 19 chauh a ni. Kum hnih liamtaah khan a u, Tamerlan nen Boston Mara­thon neihnaa a tlan tawpna line-ah bomb pahnih an tipuak a, Tamer­lan hi a hmunah police-te'n an kaphlum nghal.

March 4 aṭang khan Dhokhar Tsarnaev thubuai hi ngaihtuah ṭan a ni a, a thubuai ngaihtuah chhung hian prosecutor-te chuan thuhretu 92 zet an ko a, defence lam chuan pali chauh a ko thung.

Thubuai ngaihtuah ṭan a nih aṭangin Tsarnaev hian a thiam thu a sawi lo a, mahse a ukil-te chuan a u thu anga thilti a nih thu sawiin, hremna nep zawk pek a nih theih dan an zawnpui a ni.

April thla khan Boston-a US federal jury, hmeichhe pasarih leh mipa panga awmna-te chuan thubuai 30-ah Tsarnaev hi thiam loh an lo chantir tawh a, thubuai 17-te chu thi tura hremna pek theihna vek an ni.

Boston federal jury chuan thla hmasa khan Tsarnaev hremna atan thi tura chiu hlum an lo thlang tawh bawk.