World War II anniversary-a tel turin Donald Trump sawm

Japan-a Hiroshima leh Nagasaki khaw mayor-te chuan US president Donald Trump chu Indopui II hunlaia an khaw bomb a nih champha vawi 80-na hmanna turah telpui turin an sawm.

Mayor pahnihte hian President Trump hnenah lehkha thawnin, "Atom bomb tuartu, hibakusha te thusawi te rawn ngaithla a, remna leh muanna a awm an duhziate rawn hriatpui leh, nuclear ralthuam hlauhawmzia i hriatfiah leh zual theihna turin lo kal turin kan ngen che a ni," an ti. Nuclear ralthuam tih bona tur leh, khawvela remna leh muanna tluantling a awm theihna atana hruaitu chak tak ni tura an ngenna thu pawh an ziak a ni.

US hian Indopui II hunlai, kum 1945 August 6 leh 9 khan Hiroshima leh Nagasaki ah atom bomb a thlak a, indona hmunah nuclear ralthuam hman a nihna awmchhun a ni. Bomb an nih aṭanga reilote hnuah Japan hi a tlawm zui a, Indopui II-na pawh hi a tawp zui ve ta bawk a ni.

Atom bomb thlak vangin Hiroshima khuaah hian mi 140,000 vel thiin, Nagasaki-ah 74,000 vel an thi bawk. Mi tam tak chu a hnuah radiation vangin an thi ve leh bawk a ni. US chuan tun thlengin bomb a thlak avang hian official-in thupha chawina engmah a la sawi chhuak lo.

Kum 2010 khan US ambassador John Roos chu Hiroshima-a bomb thlak a nih champha hriatrengna hun hmanah telin, he huna US palai tel hmasa ber a ni. Kum hnih hnuah Nagasaki-a hun hmanah a tel leh bawk.

Kum 2016 khan Barack Obama chuan Hiroshima-ah hian kalin, US President ṭanglaiin a tlawhna hmasa ber a ni a, kum 2023 khan Joe Biden chuan a tlawh ve leh a ni. Trump hian a President term hmasa chhung khan khawpui pahnihte hi a tlawh lo ve ve a ni.

Hiroshima leh Nagasaki-a atom bomb thlak tuartu dam chhuak, hibakusha te chuan tun thlengin khawvelah remna leh muanna tluantling a awm a, nuclear ralthuamte tih bo vek a nih theihna turin an theih angin hma an la reng a ni. An hmalakna avang hian nikum khan khawvel chawimawina ngaihhlut, Nobel Peace Prize chu hibakusha zinga mi, Nihon Hidankyhoa hnenah hlan a ni bawk.