China Deepseek AI in technology industry a sawi nghing

China Artificial Intelligence (AI) app tih chhuah thar, DeepSeek chuan khawvel puma technology industry a sawi nghing nasa a, US tech stock pawh nasa takin a tlakhniam phah hman. Mahse stock dinhmun hi a rawn ṭha chho leh ṭan mek.

Chinese ChatGPT tia sawi, AI tool Deepseek hi Hangzhou-a electronic engineer, Liang Wenfeng siam a ni. Hman awlsam leh chak ṭha, man tlawm tak a nih avangin technology khawvelah boruak a rawn nei lian nghal hle. A elpui, ChatGPT leh Google Gemini ten subscription fee leh, a thlawna hmang turte tana khuahkhirhna an siam laiin, DeepSeek hian user-te tan fee siam loin a thlawn vekin a hman tir a ni.

January 20-a a verson thar ber chu mipui hman theih tura tlangzarh niin, tlangzarh karah US, UK leh China-ah free app download tam ber niin, ChatGPT a rawn khum nghal. A rawn lar chhuah nghal thutna hian techology company liante dinhmun a rawn sawi nghing nghal a, company hrang hrang -Nvindia, Microsoft leh Meta stock price pawh a tlahniam nghal a ni. Mahse Thawhlehni aṭang khan US tech stock te dinhmun hi a rawn ṭha chho leh ṭan tawh.

Deepseek in khawthlang lam, a bikin US-a boruak lian tak a rawn nei thei hi China sorkar tan chuan thil lawmawm tak a ni. China-a rorellai, Communist Party chuan hemi chungchangah hian sawi engmah a la nei lo a, mahse state media-te chuan US stock market chawk buai thei, DeepSeek avangin US-a Silicon Valley leh Wall Street company liante an mangang ṭan niin an sawi.